以山下智久為首嘅尊尼偶像組合NEWS，真係麻煩多多，兩年前成員森內貴寬因為被雜誌《BUBKA》登咗佢着住校服喺K場同女友親熱嘅相，之後森內就以專心學業為理由自動離隊。而現年十八歲嘅成員內博貴前日就因為未夠秤喺街頭醉酒鬧事，被警方拘留，睇嚟對佢前途有好大影響。
NEWS近期獲委任為世界女排大賽嘅日本啦啦隊，上星期四因為日本女子排球隊對荷蘭隊嘅賽事喺仙台舉行，內博貴亦同埋NEWS隊友一齊到仙台開工，據知佢當晚開完工後就同富士電視台嘅工作人員一齊食飯同飲酒。
街頭喧嘩居民報警
之後內博貴喺凌晨一點喺當地嘅公園同節目嘅女主播再飲過，點知內博貴飲大咗，喺街上喧嘩，搞到附近居民報警，警察到場時，得番內博貴一個人。由於日本法定二十歲以上嘅人先至可以飲酒，而內博貴只得十八歲，佢即時被帶返警署問話，喺返回酒店途中接受輔導。事件重連累富士電視台要公開道歉，搞到啲高層要展開調查。
獲捧演出《擊浪青春》
噚日日本嘅報章鋪天蓋地報道呢單新聞，但一般都冇提到內博貴個名。但因為前晚NEWS現身音樂直播節目《MUSICSTATION》嘅時候，只有內博貴冇出現，所以啲fans就知道出事嘅係佢，重喺網上留言板議論紛紛，擔心內博貴會被迫自動離隊。查實內博貴今年四月因為肺氣腫入院做手術，出院後就獲力捧，同鈴木杏合演日劇版《擊浪青春》，前日件事對佢同組合都有好大影響，睇嚟佢真係唔爭氣。