大宇與太太阿寶結婚五年，至今依然無意生育，他說：「我哋兩個都鍾意自由自在嘅生活，冇乜牽掛，𠵱家又有『大佬』（愛犬），我哋當仔一樣㗎啦。」
鍾意行超市
大宇不諱言現在的生活愈來愈似住家男人，他笑道：「我買嘢唔會叫賓賓幫手，反而自己去買餸，買完嘢好有滿足感，屋企啲飲品、廁紙，大都係我親自入貨，我好鍾意行超市，又平又多嘢睇，架手推車載到滿晒都係幾嚿水，好過癮㗎！早幾年就覺得核突，男人老狗去買餸、攞住嚿廁紙，黐線咩？哈！𠵱家唔係，個人細心咗，自己都睇吓隻蛋印住幾時到期，揀麵包又睇吓有冇過期先。平日我會同老婆帶隻狗行山，反而愈嚟愈唔鍾意夜生活，又嘈又烏煙瘴氣，我都幾深閨㗎。」
大宇婚後即與緋聞絕緣，對此他很自信地說：「有樣嘢我承認keep得幾好，只要有陌生人嘅時候，我會保持距離，去陌生嘅地方又會好冷靜，唔會有鬼馬，但如果同熟朋友一齊就會放縱，玩『創』晒就亂晒籠。」
大宇又說：「就算兩年冇拍戲，都係一個藝人，有時睇雜誌，有啲嘢會提醒到我，譬如會寫啲好耐唔見嘅乜乜乜、今年冇戲拍嘅乜乜乜，踎喺度食煙、後巷三五成群等運到、食住條雪條周街行，咁係會整『禍』自己㗎。一日入得娛樂圈就一世係藝人，一定要keep番公眾人物嘅形象，唔好喺後巷小便被人影到，攞住罐啤酒喺後巷攬女，被人影到就唔好啦，言行舉止都一定要小心，喺出面就真係要經常保持自己嘅儀態。」