香港導演同外國名導玩CrossOver早有《三更》，今個星期王家衛聯同荷李活導演，玩三級情慾+文藝的《愛神》；三個導演、一個主題、3個故事！其中由王家衛執導嘅《手》最特別！張震同鞏俐之間嘅愛，唔單止建基於感情，最重要原來係一雙「手」，意念絕對新鮮！
記者：陳國輝
講開王家衛執導嘅電影，相信大家都睇唔少，之但係獨立電影呢瓣，就唔係人人都識喇！《手》除咗係王家衛喺「沙士」期間拍攝嘅作品之外，佢重以兩星期時間快速完成，比起拍《2046》真係順利得多！至於另外兩位荷李活導演來頭都唔簡單，《夢》由史蒂芬蘇得堡執導，佢憑着《性感的謊言》一炮走紅；而《慾》嘅導演──安東尼奧尼，更加係電影界老前輩，據講《愛神》都係因佢而開拍。
《手》起承轉合一「手」包辦
小張（張震飾）和華小姐（鞏俐飾）嘅一段情，由互不相識以至深深愛上對方，全程原來係由一「手」包辦，以下必睇位，大家非留意不可！
起 一見如故
小張第一單生意，就係幫華小姐度身做衫，點知，當交際花嘅華小姐竟然失驚無神同佢玩「五姑娘」，把年輕膽小嘅佢嚇壞。事後小張不單止繼續到華小姐嘅住所幫佢度身，而且重漸漸地喜歡上對方。
承 單戀成狂
喺華小姐當紅嗰陣，對於小張嘅暗戀毫不知情，亦從不理會！不過小張就真係愛得既苦又痛！佢一邊幫華小姐縫衫，卻一隻手插入衣服入面，左搞搞右搞搞。做緊咩？咪就係幻想緊同華小姐有肌膚之親囉！
轉 代交房租
60年代香港製衣業發達，相關嘅裁縫行業變得好吃香！小張憑一雙擅於縫衫嘅手，幫佢搵唔少錢；在華小姐流離失所之際，又幫佢交租，又免費縫衫，兩人間慢慢萌生感情。
合 最後接觸
喺呢個時候，大家終於坦白承認愛上咗對方。之不過，當小張正想親吻華小姐嘅時候，卻因為華小姐患上嚴重嘅傳染病，被一口拒絕！最後，小張只能撫摸華小姐嘅面頰，痛苦之情，不言而喻！
百看不厭嘅60年代
其實唔睇故事，齋睇張震同埋鞏俐嘅衣着打扮，一睇就知係導演王家衛對香港60年代嘅寫照。嚟到《手》，男主角小張依舊係斯斯文文嘅「二撇雞」加西裝Look打扮，華小姐則係頭髮Set到靚一靚，再穿上一套「旗袍」裝嘅交際花。當兩人走埋一齊，感覺真係好似睇緊梁朝偉同張曼玉演對手戲一樣！唯一可惜是DVD碟內並冇拍攝花絮及製作特輯，否則會更圓滿！
《夢》夢中尋愛之根源
如果每晚發夢，你都係同一位唔識嘅女人上床，你會有咩感覺呢？好驚？抑或好想每晚早啲上床瞓？喺《夢》入面，從事高壓力工作嘅廣告從業員尼克因，就因為呢個春夢，一直備受困擾，於是佢決定去睇心理醫生，搵出真正嘅答案為止！
《慾》老夫老妻找新體驗
其實講衝動呢家嘢，係咪後生仔先有嘅呢？《慾》係講一對年逾三十嘅夫婦，因為性生活唔協調，於是幾乎嘈到要鬧離婚。後來，兩人分別遇上同一個不羈少女，重受到佢深深影響；男方旋即擦出火花，而女方則領悟出新體會。
DVDPro（23326326）
地址：旺角奶路臣街6E德發商場地庫B4舖