律政司司長梁愛詩一聲話阿姐想唔撈，六個月通知，年底收工，嚇得肥龍同煲呔半死，大叫慘情。
詩姐姐話乜嘢大單嘢都搞過晒，係時候功成身退，但係對於煲呔同肥龍呢對難兄難弟嚟講，簡直係噩夢開始，因為係人都計到，如果份政改方案九月出籠，年底剛好打到埋身，詩姐姐離隊，得番肥龍同林D9，真係震過貓王，一個唔好彩整多件馮華健，就認真大大鑊。所以八方聽聞，有關人等已經向煲呔曉以大義，唔可以掉以輕心，必須用盡所有法寶，令詩姐姐回心轉意，就算做唔埋尾，都坐到明年中，等啲選舉法搞掂晒先至起身。
要慢慢搵接班人
所謂「送佛送到西」，點可以將青靚白淨嘅唐僧中途放下不理，任由啲妖魔鬼怪，衞道之士將佢亂舞？正係鞠完躬，都唔爭在送埋上山啦。
八方唔係講衰嘢，因為好多人都係直到今日，先知詩姐姐可愛，佢雖然冇45條關注組班大狀咁開放，但係佢的確冇乜私心，冇諗過要害人，簡直可以話係菩薩心腸，所以放過咗胡仙，因此佢哋估只要中央出手力挽，應該可以留住梁愛詩一陣嘅。
如此一來，詩姐姐嘅接班人亦唔使咁急要搵。馮華健一向都恨做律政司，但係煲呔同肥龍可能唔係咁諗喎，大家都好難忘記佢喺領匯一役中嘅表現。至於其他親中人士，亦冇乜邊個夠班；非親中陣營嘅大狀又未必肯制，喂，呢份工係人都知唔係優差，又點解要咁辛苦呢？
重有，就算有民主人士肯做，又要過北京嗰關，你估好多個李國能咩。
傳真︰2623-9278
電郵︰[email protected]