左丁山一日訂購中西報紙十份，睇十幾份，平時再加馬經、雜誌，當然係報紙檔好客仔。昨日見到報販苦口苦面，問佢點解，佢嚡嚡聲話：「今日剩咗好多紙呀！」手指一指，地上有二三十份賣唔去嘅日報，唔算多吖嘛，使乜呻到樹葉落。報販話：「你有所不知，以前真係冇乜紙剩㗎，今日多咗一份《頭條日報》免費派送，害親呀。」
左丁山平時冇坐地鐵返工，從未攞過《都市日報》，《頭條日報》啱啱出，未睇過。返到公司，叫信差次日返工之時，順手攞兩份嚟睇吓。
星期五早上，信差送上《頭條日報》、《都市日報》各一份；咦，份《都市》厚五十六頁，相等於「大紙」（broadsheet）七張紙或二十八版。數一數，五十六版之中，廣告篇幅佔三十七版，如果每版淨收三萬元（估計數字），成一百一十萬元一日噃，用婆仔數?大拇指法則計一計，呢份報紙一年賺幾千萬，一啲都唔難，唔怪得好多人眼紅，要同佢搶一搶；就算唔搶，都要做番啲嘢嚟保護自己檔攤。
份《頭條日報》有二十四版，廣告幾乎欠奉，相信要捱番一兩個月，先至可打開局面，到咗八月一號，施永青嘅《am730》加入戰團，一齊進攻《都市》，夠熱鬧咯。《都市》、《頭條》、《am730》據講加埋會印紙一百萬份，係咁派，收費六元嘅日報如果話不受威脅就係假嘅，相信最得益、賺硬就係印刷廠以及紙商，市民得到嘅好處就少啲，冇理由淨係睇免費日報嘅啫。不過萬變不離其宗，免費報紙好，收費報紙好，最緊要有內容，有靚版面，兩樣都冇嘅話，送都冇人要喇，除非係收埋去斷斤賣。活力先生個菲傭話街市行情，舊報紙每斤賣八毫，拾荒者不妨每日去接收免費報紙，集埋就拎去街市賣。