長實紅磡海名軒趁新盤市場空檔重推，特別選址中環長江集團中心，新設巨宅鑒賞館，真嘅示範單位就冇再整，縮水版就有一個，就係複式單位模型。
個模型造得好逼真，長實營業經理梁焯鏗話，第三座B室，四千二百幾方呎模型單位，間隔清楚可見，原來係搵咗個外國設計師做室內設計，當正示範單位咁做，包括有齊家具、陳設，同浴室個按摩池等。
淨係呢個模型都造咗一年，費用要一百五十萬，成個鑒賞館就用咗七百萬，遲啲會擺埋相連單位嘅模型。
梁焯鏗話，𠵱家推出兩套相連戶，分別係第二同第三座中高層B室，三千八百幾同四千三百幾呎，呎價萬四，每間要五六千萬，個模型就正好畀啲準買家參考。另外，今個禮拜一推出嘅八個分層單位，已經賣晒，套現二億二千萬，呎價萬三至近萬六。
電郵地址：[email protected]