元華（右）、元秋（左）同房祖名等人噚日起程去馬來西亞，出席當地嘅金藝獎頒獎禮。祖名代表《千機變2》領獎，而元華同元秋憑《功夫》分別奪得「最受歡迎男、女演員」獎。現時準備拍攝《功夫2》嘅元秋，得獎感受就有啲奇，佢話：「我啱啱先知攞乜獎，所以標冷汗。」元華就話：「真係好開心，不過係受歡迎演員啫，又唔係男主角。」