電腦Ｊ本係財經寫手，做財經公關、新聞記者起家，轉型成為techie之後，好多人以為佢只係識電腦，唔記得佢嘅老本行。香港俗語有云：hitechhi嘢，lowtech撈嘢，過咗千禧年，香港人已經唔記得乜嘢叫做高科技咯，電腦Ｊ惟有死捱。
呢日電腦Ｊ打電話嚟，叫左丁山介紹mediasales（媒體廣告營業員），原因係佢個老友，媒體廣告大佬Ｒ呢排做到頭都大，身為元老級人馬，具推銷廣告三十年經驗，仍然要親自出街周圍撲，於是叫電腦Ｊ幫手搵人。電腦Ｊ話：「大佬Ｒ冇法子請到夥計，呢排頻頻親自出街，捱得好辛苦；喂，有工冇人做喎，你識得就介紹啦。」
左丁山唔算識得人多，醒起以前嘅同事Ｒ姐，甚有經驗，做過主管級，喺唔同嘅周刊、月刊、報紙推銷廣告，前兩年賦閒在家，於是叫電腦Ｊ去搵Ｒ姐。電腦Ｊ猛咁笑：「你有所不知，Ｒ姐已經看破打工生涯，唔想再做mediasales，喺銅鑼灣開咗一間日本食店，自己做老闆兼侍應，你去幫襯，定好招呼！」嚡，廣告營業界又損失咗一位好人才，做呢行搵食並不容易，好容易一個浪（如沙士）冚埋嚟，就會沒頂，兼且呢行都幾講「班底」，跟「大佬」、「大姐」，有陣時因為媒體內派系鬥爭、公司政治，隨時要起身，冇得撈，故此唔少老經驗之人有機會就轉行；新人方面，入行要捱苦，一上工就要俾老闆分配salesquota，被「卒數」，你估易捱咩。想起Ｒ姐做侍應，好想去幫襯，電腦Ｊ話得閒就帶左丁山去。
近來似乎幾好景，廣告推銷員請唔到，記者又請唔到，都唔知發生乜事。想由孤獨的推銷員做起，三十五年後做香港特區特首嘅，不妨𠵱家就入行，捱得兩三年鹹苦，望住曾蔭權做人，好有滿足感啫。