繼小Q之後，又有一部日本寵物電影即將上畫，片中唔止一隻狗仔擔正做主角，重有齊柴犬、邊界牧羊犬、八哥、貴婦狗等車輪戰出場，實行冧到你班狗癡暈陀陀。今次我哋唔使去到日本咁遠，就喺香港搵齊四大「老翻」主角，上演嘅亦唔係人狗情，而係大玩食物測試遊戲，睇吓佢哋最Like咩類型的狗糧！
記者：黃藹瑩 攝影：陳陶鈞
鳴謝：DOGONELIFE
攞正牌測試員
測試一
邊款狗糧最好味？
其實，狗同人都一樣對食物都會有所揀擇，到底狗狗鍾意食乜呢，四大主角即時做一個「真狗」版大測試！大測試開始之前，梗係要知道有今次會有咩「參賽」食物啦！狗兜入面總共有４種食物：包括係人同狗都嫌佢齋的白飯；喺超級市場銷售情況好理想嘅罐頭狗糧（牛肉）；聞落好香的狗Cafe即煮肉醬意粉（豬肉）；以及在另一間狗Cafe購買的雞肉沙律。一於睇吓呢幾位大帝會最先食邊樣！
四隻狗都會得到同一份量、同一種類的食物，我哋分別將呢４種食物放喺唔同的狗兜入面，等佢哋可以同一時間進行大測試。Ready…GO！
八哥：罐頭牛肉
呢隻八哥波波可以話係相當之為食！佢一見到個狗兜放好咗，就已經急不及待跑到去盤食物面前，聞一聞，索一索，二話不說就埋頭狂食罐頭牛肉都冇抬起過頭，真係服咗佢囉！
貴婦狗：罐頭牛肉
貴婦狗Gigi可能真係高貴啲，測試期間明顯冇八哥波波食得咁快，反而食得幾斯文喎！不過咁，佢哋都有個共通點，就係一試食，就會先揀牛肉食，食完牛肉之後再食肉醬意粉，唔通個罐頭牛肉真係咁美味？一於睇吓另一位參賽者柴犬Nana揀邊樣食先？！
柴犬：罐頭牛肉
噢！原來柴犬Nana都係罐頭牛肉嘅支持者！可能Nana都係女仔，食相就冇波波咁核突，聞吓聞吓，揀吓揀吓，唔……一樣都係揀牛肉！唔通其他食物肉醬意粉同雞肉沙律都比唔上罐頭牛肉？人類可能好難明白。
邊界牧羊犬：肉醬意粉
最後，輪到最有型的主角邊界牧羊犬啦。不過真係估唔到最後的呢輪測試會有爆冷賽果！邊界牧羊犬Dolby與眾不同，佢只係聞一下就揀咗Cafe提供嘅肉醬意粉。唔……Dolby呢隻明星狗果然零舍唔同，口味都要同大家有啲分別！唔知大家認唔認得呢隻Dolby呢？佢拍過潤喉糖廣告㗎！
賽後總結：罐頭牛肉以大比數勝出！原來狗狗都愛超市出品，快靚正。
測試二
即譯狗狗想講乜？
日本人真係好鍾意搞騎呢發明，呢部曾經喺電影入面出現過的狗狗繙譯機，製造咗唔少笑話。今次接受測試的係貴婦狗，我哋搵來Gigi同Bibi，一齊睇睇佢哋想講乜？
吠多幾聲有偏差
Gigi嘅另一位主人JP話Gigi特別鍾意吠，重叫得好大聲，搵佢玩呢個繙譯機啱晒。冇錯，Gigi真係吠得比較頻密，部機嘅訊號不停接收，連續吠幾聲就已經有幾個唔同的繙譯版本。不過訊號一時就話Gigi「好唔開心」，一時又話Gigi「好興奮要去走走」，吓?!
除咗搵Gigi之外，我哋搵埋貴婦狗Bibi一齊試一試部機……可惜最大問題竟然係……Bibi完全唔吠，都唔知話佢乖定唔合作好嘞！
幕後花絮場外狗派對
