毓民突然被商台炒魷，fans冇乜機會透過收音機聽佢月旦時事，為答謝支持者同顯示天大地大，總有地方容得下毓民開咪，民主派立法會議員今晚八點鐘，喺中環遮打花園舉行燭光集會，屆時唔止毓民，已被封咪嘅多位名嘴都會現身開咪，包括「十點前特首」鄭大班，同埋佢個老拍檔林旭華，一度頂替大班嘅梁文道亦有份，至於同商台不歡而散嘅李鵬飛，據講今晚約咗人喺附近食飯，飯後隨時路過。
有搞手笑言，遮打花園今晚會變成商台直播室班底重演，八方聽聞部份商台中人都打算到場，係踩場收風定默默支持，相信大家心中有數。
另外，阿牛日前去問當局想申請開民間電台，佢哋話係有兩條AM頻率可供使用，但一定要覆蓋全港，重叫阿牛交申請書，阿牛計過要成千萬，點敢郁。
傳真︰2623-9278
電郵︰[email protected]