油價持續上升，搞到航空股完全冇運行，繼南方航空（1055）後，昨日又輪到東方航空（670）發出盈利警告，話估計上半年會錄得虧損，後者昨日一度跌至1.18元，收1.22元，跌咗0.8％。
至於國航（753）雖然冇盈利警告，但股價一樣積弱，幾乎創上市以來新低，昨日又跌1％，收2.475元，但經紀陳就問小初，有冇留意中航興業（1110）？
佢話中航興業股價表現異常硬淨，完全無受大圍對航空股的氣氛影響，江湖於是又再盛傳，話隻股傳出多時的收購合併計劃行將落實咁講。
中航興業昨日升2.69％，收1.91元，成交股數328.6萬股，金額623.4萬元。
經紀陳話，收集過行家資料，發覺隻股尤其受到大陸同胞歡迎，而唔多似係芬佬線。
雖然中航興業旗下港龍航空，上半年無論客運或載貨量數字都錄得不俗的升幅，但以油價咁升法，實在無理由唔受影響，所以小初都係認同市場的傳聞，隻股企得咁穩陣，必然唔係因為基本因素，而係另有原因。
慕容小初