過去幾年，香港政壇冒出咗幾位大狀，當中以梁家傑最為嚴肅，畀人一絲不苟嘅感覺，但係原來年輕時嘅傑仔到長大咗嘅傑哥，都有唔少嘅趣事，值得回味。
梁家傑第一本書下個星期出版，當然係為咗要趕及書展；另外亦都為咗要同湯家驊、余若薇以及吳靄儀三個45條關注組嘅成員看齊，佢哋個個都已經將啲文章結集成書。
傑哥話過，佢一定有新嘢畀大家睇，原來係佢同黃毓民嘅對話錄以及佢追女仔、選袋巾等逸事，當中亦有佢老哥嘅童年照同結婚照。𠵱家要本書賣得，真係乜都要出賣。
梁家傑本新書，第一版出三千書，書名好奇怪，叫做《你好，我係梁家傑》。原來喺過去一年傑哥唔知講咗幾多次「我係梁家傑」。佢喺自序中話，呢句話係選舉中上佳嘅破冰句子，可以打破人與人之間嘅隔膜，令佢以五萬六千幾票高票當選，所以佢希望用呢本書同讀者打開話匣子，等下次喺地鐵撞到，可以多啲話題。Alan以這本書獻給父親，因為好多回憶都係父親留下畀佢，包括啲舊相片。
皇仁仔為華仁仔服務
話時話，香港政壇真係好多華仁仔同皇仁仔，好似煲呔咁，早前就被班皇仁仔圍住，佢哋以許仕仁為首，重有陳德霖同陳羿，全部都係皇仁仔，不過正如啲皇仁仔話齋，佢哋點叻，都係為華仁仔服務啫，皆因煲呔正係香港華仁嘅畢業生，而馬丁同梁家傑都係九龍華仁仔。
除咗傑哥，另一個九華仔周致聰律師亦會出書，書名叫做《非典型尖子》，講吓佢嘅奮鬥史，都好啱年輕人睇，佢重搵到終審法院常任法官陳兆愷寫序言。
傳真︰2623-9278
電郵︰[email protected]
