身為中聯辦高層，又點可以唔知報界動態，不過八方勢都估唔到，連《蘋果日報》有個設計師離職，副主任李剛都一清二楚，唔通佢擺咗偷聽器喺《蘋果》度？
話時話，李剛都算係《蘋果》忠實讀者，佢話自己每日都睇《蘋果》，覺得我哋個版面設計搶眼，視覺效果好，尤其係大標題、大圖片，但不忘加多句：「最緊要真實」，跟住就唔肯評論《蘋果》算唔算做得好喇。不過佢就如數家珍咁分析香港各大報張嘅發行量，重話《蘋果》賣三十幾萬份，其他報紙又一樣好賣，唔見得香港人只係睇一張報紙。
既然係傳媒一分子，八方都好想堂堂正正返大陸做採訪，所以問李剛，中央幾時可以解禁，點知李剛都只係笑一笑，話「那要問問你的老闆」，咁即係點呢？
傳真︰2623-9278
電郵︰[email protected]