音樂創作人出身嘅新進男歌手側田，主唱嘅處男歌《好人》都算一鳴驚人，喺上個禮拜嘅港台中文金曲龍虎榜上，壓倒Twins嘅《森巴皇后》榮登冠軍寶座，雖然側田唔算靚仔，但勝在有才華兼唱得，難怪連黃柏高（Paco）同雷頌德（Mark）都有興趣爭簽側田嘅經理人合約。
成餐飯未笑過
本周三下晝兩點零鐘，Paco、Mark同側田就喺港灣中心嘅一間西班牙餐廳出現，三個男人坐喺露天位置食飯，但Paco同Mark一臉凝重，成餐飯都未笑過，搞到側田都有啲尷尬。
馮仁昭打聽之下，至知原來嗰日係Paco同Mark為側田嘅經理人合約講數。
事緣側田簽咗Mark旗下嘅OnYourMarkLtd.公司音樂創作合約，而Paco就簽咗側田嘅歌手約，兩位幕後猛人都認為側田係樂壇可造之材，結果咪爭崩頭搶簽約囉，但問題係佢兩個在公在私又好friend喎，難怪令側田唔知點算好。
話時話呀，今年樂壇新人極多，但暫時搶先跑出嘅男新人有側田、應昌佑同關智斌，側田應該會有一番作為嘅，雖則未知佢花落誰家，但馮仁昭就估佢都係泊Paco碼頭居多。
