恒指波幅105點，埋單升近13點，全部歸功於長實（001）。長實高收82.45元，進帳1.70元，啱啱拉高恒指13點。長實C輪自然繼續生猛。
過去1周，長實升8.35元，升幅超過1成，9RSI上到87。大行齊齊話好，即使真係好落去，都會因超買而調整。揸咗C輪，贏大錢者，都應該袋錢落袋先，暖吓荷包，咪等煮熟鴨仔飛咗去。冇貨者，亦咪貪勝不知輸，先忍吓。
中銀C輪9068：中銀（2388）係對恒指貢獻第2大嘅藍籌，收15.15元，升0.25元，拉高恒指8點。中銀C輪，熱門貨例如9068，升幅16%。短期而槓桿率較大嘅，例如3769，則大漲54%。
大藍籌，個別炒。啲錢堆落邊隻，則邊隻升。中銀有機會向上撲到去年12月15.40元高位，然後再上撲去年2月15.95元高位。幾毫子嘅升幅，對C輪嘅牽引作用好大。不過𠵱家9RSI上到80，等等，等回落時買C輪，正路之選仍然係9068，夠晒長壽，明年6月夠鐘，輪價80仙，溢價3.5%，槓桿率18.9倍（有效10.2倍），引伸波幅13.8%。
平保C輪2229：中國財險（2328）有啲錢可能收唔番，近期走勢唔好睇，可能有啲迫住要揸保險股嘅基金，將啲錢掟落平保（2318）。平保收12.60元，造高0.30元。C輪3837嘜2.8仙買入，按盤價急升86%，冇意思，下周三最後買賣，行使價13.40元，隻輪瓜多過菜。
平保C輪數據最靚係2229，輪價22.3仙，負溢價0.3%，槓桿率5.7倍，不過冇乜成交，本月26日最後買賣，好難做嘢。
章盛