無論街機玩家定係一般家用機主，相信都沉迷過KONAMI隻《DanceDanceRevolution》，雖然現時跳舞機熱潮已過，不過好遊戲始終係好遊戲，只要有一點點火花，仍能製造驚喜，今次火花就由任天堂帶動，推出以旗下人氣角色瑪利奧為主嘅《DanceDanceRevolutionwithMario》（DDRM），由瑪利奧陪你跳舞，一班Fans必定玩得更投入！
記者：許福合
攝影：伍慶泉
ImageGirl：小惠
若對呢隻《DDRM》有興趣嘅話，奉勸要趕快行動，事關今次《DDRM》返貨唔多，據知因香港GC機主始終較少，代理入貨唔多，有遊戲店表明只得一兩盒看門口，賣完就無！筆者執筆時門口價為$480，不過睇嚟炒味好重，隨時坐地起價，瑪利奧Fans要入貨就請早！
狂跳打Boss
今次《DDRM》與前作最大分別，當然係用瑪利奧等任天堂嘅可愛角色，連帶畫面都變得好有任天堂風格，《DDRM》包裝除咗遊戲外，重包埋一張跳舞氈，上面印有瑪利奧個影，Fans睇到必定流晒口水！比起六年前《DDR》大熱時的跳舞氈，今次任天堂明顯有進步，以前一邊跳張氈一邊跣，靈敏度亦不足，今次任記不知用了甚麼物料，張氈隨便一放，勁跳都唔會移位，而且啲掣好敏感，抵讚！
《DDRM》故事性比過往《DDR》強，用上瑪利奧做主角，更為佢度身訂做咗個「舞術」冒險之旅；遊戲之初，對住啲小角色難度明顯較低，只會用到「←」同「→」，要過關唔難，筆者輕易取得A級；不過面對下一版Boss，難度就開始增加，要玩家同時踩「←」同「→」，即係要跳起「起雙飛」先能夠應付，再落去加入上同下，變化花樣更多，真係地板薄啲都怕嘈到人。
考節奏考反應
DDR要玩得精，當然要有一定節奏感，遊戲之中至少會出現25首改編舞曲，當中分為唔同難度，而且有好多重係任天堂嘅經典遊戲音樂，連夢工場首歌都有（啲啲嘟嘟嘅電子音樂好鬼難跳），所以任天堂Fans跳起零舍有親切感，加埋遊戲設定內可選擇5種難度，玩家可因應能力挑戰。
曾經玩過DDR嘅玩家，可能都有幾招「獨門」招數，都有機會喺《DDRM》使出來，好似遊戲第一版，最簡單嘅企位唔係面對電視，而係打橫前後腳企，咁就可以輕鬆應付主要「←」同「→」嘅舞曲，要拎A絕對唔難！
MiniGames扑儍瓜
任天堂似乎對MiniGames情有獨鍾，以故事模式進行遊戲時，間唔中會出現迷你遊戲，好似有扑儍瓜、接香蕉、控制瑪利奧閃避等；迷你遊戲同跳舞時唔同，跳舞時Miss會扣「星星」，但迷你遊戲即使未能達標，都可以繼續玩，成功咗就會獲得金錢獎勵，拎住錢可以到商店購買各類型道具，能夠更容易跳贏Boss級敵人！唔玩故事Mode，另外重設有標準跳舞玩法，不過好多舞曲都係隱藏嘅，要從故事Mode開咗先有得玩，難度一般亦較高！雙人模式亦已經Ready，不過就要預備多一張跳舞氈喇！
遊戲資料
主機：GC
開發：KONAMI、任天堂
類型：跳舞
售價：$480
DREAMSTORE
地址：灣仔東方188商場256號舖
查詢：25753285