大行唱好加上有資金追貨，大市噚日再勁升184點，收報14491，逼近14500大關，而期指更已突破14500，相信港股市會再破關上試高位，14500唔算係真正的阻力。
較值得留意的是港交所（388）噚日獲摩根大通唱好要見25元，即獲資金追捧，升至21.95元全日高位收市兼創歷史新高，升4%。港交所盈利表現主要視乎現貨及衍生工具的交投，而交投是否活躍就好視乎市場游資，唔知是否有人洞燭先機，知道將有大量資金湧港呢？
資金市難估頂
黑客話，港股噚日成交高達279.35億元，話冇資金流入都冇人信，大行最近無情情唱好多隻重磅藍籌，理由是否充份見仁見智，不過好多國際大基金若要增持某個市場，都需要大行的報告作為支持及根據，大行的唱好報告，正好為熱錢流入鋪路，只要個別大藍籌炒上，其他基金亦要追落後，聯想（992）與信置（083）亦有追落後資金追捧，由於兩股一向成交薄弱，一旦受大量資金追捧時，股價就會出現爆炸性上升，前者大升6.3％至2.525元，後者升5.4％至8.80元。當然IBM與蘋果電腦業績靚靚亦是聯想受追捧的原因之一。
港股後市表現將由資金主導，而且可能只是一個開始，雖然有人覺得港股已經好貴，不過資金市的玩法一向都是將個股市炒高到無人會信的水平，然後迫使其他無貨在手的基金補倉（或者接火棒）。
中海油（883）被傳再加價收購以討好優尼科股東，但就不受股民歡迎，股價逆市跌1.52％至4.875元。不過有消息話，中海油最多只加價3％至190億美元，相信對中海油的壓力唔會好大。
阿虎