施大姐邀請睇試片，問左丁山要睇早場還是睇夜場，問吓時間，早場朝早九點九，夜場晚上九點九。唉吔，朝早要開工，晚上太夜，阻住上床。結果冇得睇，實在係損失。施大姐話套戲長兩小時半，睇夜場要睇到十二點三，返到屋企已經係凌晨一時許，實在頂唔順。
於是話畀施大姐聽：「留番電影上演後先至捧場，睇五點半或者七點半最啱數。」施大姐哈哈大笑：「你真係out咯，𠵱家睇戲已經唔係兩點半、五點半、七點半、九點半嗰款嘞！」又係，自己已經好耐冇入電影院，連睇戲時間都唔知㖭。
碰到戲院陳，佢話：「唔該你睇戲之前，上網望清楚啲放映時間，間間戲院唔同㗎。」問戲院陳：「市道如何？」佢話：「算好嘞，我哋條院線只係比去年跌咗十巴仙啫。」票房收入下跌都話好？點做生意呀？戲院陳話：「有乜辦法，香港人睇戲，始終鍾意睇港產片，但係港產片一年生產唔夠十部，點夠我哋一年放映？如果十部都係《無間道》、《頭文字Ｄ》，咁又唔同講法。」
戲院之中，邊間最好生意呢？據戲院陳透露，二十年來（自一九八五年開幕以來），始終以沙田新城市廣場嘅ＵＡ佔第一，《頭文字Ｄ》嘅首映全國紀錄（包括內地戲院），就以沙田ＵＡ為首。新城市廣場啲人流，可能稱霸全港，年輕人又特別多，故此新城市廣場ＵＡ生意獨好。金鐘太古廣場嘅ＵＡ，以西片迎合外籍人士最合，港產片在金鐘ＵＡ，多數唔掂。掉番轉頭，商場需要戲院吸引人流，冇戲院就始終差啲。
施大姐老公徐大導嘅新片，千呼萬喚始出來，慢工出細貨就係徐大導嘅風格。呢套《七劍》改編自梁羽生名著，去到天山拍實景，係以前想像唔到嘅。