大戶要造起個市，話都冇咁易，噚日繼續掃住啲大藍籌，恒指終於一舉而衝破長達大半年嘅徘徊區阻力，呢一仗，淡友被殺個措手不及。恒指收14491，大升184點，期指收14507，升204點，成交更大增到279億元，動力強勁，確認開展大升浪。
睇盤路，大戶重收緊貨，不過，佢哋應該已收得八八九九，正係畀全世界知道都冇所謂，所以毋須再㩒實個市，放心造佢上去。大戶部署咗咁耐，後市肯定大升，下半年恒指有機會見15500至16000，不過，近日升得太急，短期唔排除會出現調整。
國企個別發展，大成份股回軟令國指跌23點。早兩日推介嘅哈爾濱動力（1133）逆流而上，高收3.15元，升0.1元，創97年中以來新高。睇周線圖已升破旗形阻力，短線量度升幅3.80元。
今個升浪，暫時主力重係在大藍籌，層面並未擴散，但藍籌唞氣之時，二三線就會接力而上。前日推介嘅銀建（171），噚日大升14.2%，高收2.60元，成交更大增到4321萬股，大行同基金重係咁買，今次好淡撼得咁激烈，又一次財富大轉移。
傳又有大動作
雖然4大資產管理公司今後會畀人睇到實，但以千億計嘅不良資產一樣要處理，銀建嘅生意照做，一落實有新deal，市場疑慮就會消除，銀建股價就有機會再向高位挑戰。
威華達（622）呢輪頻有動作，但股價表現就背道而馳，令人失望。不過，噚日收到料，話威華達好快（可能在下月）又會有大動作，家吓股價已回落咁多（1個月內由1.02元落到0.74元，跌幅27.4%），無論技術上或睇公司嘅前景，都值得入市博反彈。
威華達最近斥資2.5億元人民幣，收購深圳福華德電力30%股權，令福華德成為威華達全資擁有的子公司，日後在爭取供電香港將更易「話圍」。
威華達已完成收購及增持百江燃氣（8132）至60.57%權益，成為集電力、燃氣及煤氣化於一身的大型能源公司，估計05年度（12月年結）盈利3.5億元，06年升至5億元，每股盈利10.4仙，預測PE僅7.2倍，相比其他電力同燃氣股，好吸引。
郭兆誠