日本人氣女星、曾演出日劇《在世界中心呼喚愛》的綾瀨遙為飲品寶礦力所拍嘅廣告最近喺香港熱播，佢喺廣告入面着住白色比堅尼玩水，性感得嚟夠晒春青氣息，引死唔少男fans。前日，遙妹就以代言人身份出席宣傳活動，佢化身機長指揮小型飛機喺天空噴煙砌字。
字體高四百米
遙妹前日着上藍色飛行制服現身東京調布機場，參加寶礦力嘅宣傳活動，展現出英氣十足嘅一面，同佢平日嬌滴滴嘅形象非常唔同。遙妹坐上小型飛機，為活動擔任司令官，指揮五架小型飛機用白煙喺天空上噴咗高四百米、長達四點五公里嘅「POCARISWEAT」字樣，非常壯觀，而寶礦力方面重打算申請入健力士紀錄大全，成為世界上最大廣告標語。
盼在空中約會
遙妹成功返回機場之後，大叫非常興奮，重話可以打入健力士紀錄覺得非常光榮。現場嘅記者問佢想唔想同男友一齊搭小型飛機喺空中約會，遙妹話咁都唔錯，可惜𠵱家重未有對象喎。而呢個活動會由今個月十八日至下月三十一日，巡迴日本全國表演。