為咗答謝李嘉誠嗰十億捐款，港大醫學院諗住改名做李嘉誠醫學院，港大副校長李焯芬早前重形容命名等於「去飲做人情」，搞到反對改名嘅學生同校友即刻向佢開火炮轟。噚日郭家麒聯同六位醫生校友一齊踩上港大，明寸李焯芬，話要送番個人情畀校長徐立之，叫佢還畀李嘉誠。
七位校友用一個寫住「人情」嘅大信封入住三個反建議，希望校方唔好郁醫學院個名，改以李嘉誠生物科技研究院、李嘉誠醫學研究所或李嘉誠千禧校園嚟回禮，而唔應該將醫學院過百年嘅成就同光榮歸晒畀李嘉誠。不過噚日徐立之冇出現，呢個人情由副校長麥培思代收。
郭家麒話，呢次命名傷咗一班學生同校友對醫學院嘅感情，呢份感情用錢都買唔到，不過李嘉誠係大有錢佬，可能以為乜都可以用錢買。佢又寸李嘉誠之前話富貴如浮雲、名利如塵土，但喺呢件事上睇到佢得個講字，所以佢對李嘉誠嘅敬重都減少咗。
爆料熱線：29290000、27860099
報料傳真：26239278
報料電郵：[email protected]