近期豪宅大熱，賣點不外乎景觀、地段同用料，會德豐地產拆售嘅山頂種植道1號都唔例外，噚日帶記者上山頂，睇睇個無敵靚景。難得天朗氣清，喺種植道1號第二座個複式單位望出去，南區海景盡入眼簾，見識到乜嘢叫做「海天一色」。
上到天台，一邊望到中環維港，另一邊更遠望愉景灣同青馬大橋，有機會睇埋迪士尼放煙花。
會德豐地產營業及市務董事黃光耀話，繼第一座後，第二座都拆售，原價推出二樓A及B室，呎價二萬一千八百幾，而二座坐向比較好，預計整幢售價會比一座高半成。
至於嗰個雙重煙花景嘅複式單位，黃光耀話，一座意向呎價二萬八，二座都係貴五巴仙，而且傾向以相連複式出售，面積達四千三百幾方呎。
電郵地址：[email protected]
