女朋友央求吃一頓燭光晚餐歎鵝肝，不用到法國餐廳，其實潮州檔的鵝肝一樣美味，一樣可以刀刀叉叉你餵我我餵你。只要你不介意裝修、不介意坐摺櫈，以下介紹的潮州滷水鵝肝，必試！不過燭光請自備。
記者：周頌堯
攝影：林栢鈞、周郁文
模特兒：Isa、Ken（Slavador）
一家三口齊齊落場
「潮州村」老闆陳先生，潮州汕頭出生，自小跟父親學煮食，出入不少酒席、喜宴場合負責執頭執尾，日積月累到寶貴的煮食經驗；24歲，隻身到港闖天涯，中間做過不同行業，最後都決定自己開食店：「一來鍾意食，二來唔想浪費自己一手廚藝，唔熟唔做，咪開間潮州滷水店囉。」小本經營，他是店子最老資格的潮州師傅，一切出品由他定奪；女兒Becky遺傳老爹愛吃性格，偶爾入廚房幫手炒幾味，揸鑊姿勢有板有眼；陳太則負責樓面招呼客人，一家三口寓工作於娛樂。
老闆堅持親力親為
店子位置在食肆林立的電氣道，「潮州村」之前易手四五次，但統統做回潮州菜，陳先生：「我堅持親力親為，先保持到食物質素，有啲老闆初頭肯捱，但間舖一上軌道就交畀其他人打理，自己就懶懶閒，Keep唔到食物水準咪執笠囉。」菜式方面，除正宗炸蠔餅外，必試其他潮州店少做的滷水鵝肝，鵝肝滑溜，陳生自傲地說：「邊個話法國餐廳先食到鵝肝，滷水檔一樣有好味鵝肝！」
滷水鵝肝
堂食$42 外賣$60
招牌菜，極受食客歡迎。陳先生：「鵝肝要揀大件厚身，重12安士淺黃色先係靚貨，唔靚我唔賣㗎！」鵝肝先浸冰水，保持新鮮兼浸走穢物，吊至乾身後浸20分鐘滷水即成，記者試過，入口即溶沒誇張。
潮州蠔烙$38
蠔烙，即廣東人所謂的蠔餅，新鮮蠔餅不會炸到一粒粒，陳先生：「倒落大盆撈生粉，先清除到蠔仔裏面嘅泥沙，用手感覺到裏面無沙嘞，都重要再沖多幾次水。」乾淨蠔仔混薯粉、胡椒粉與鹽放鑊快兜，最後放少許蛋黃綑邊才大功告成。
荷包鱔$48（一盅兩件）
半世紀前的上等潮州菜，喜宴場合才有機會吃。用鹹菜包着起骨白鱔片入鑊燉30分鐘，白鱔片充滿鹹香，陳先生：「意頭菜嚟㗎！鱔片吸收水份會脹大，寓意荷包腫脹。」
潮州泡粥竹仔魚$25
湯底用老雞、豬骨、蝦殼及大地魚熬成，加飯成泡粥，最後放屬海魚一類的竹仔魚，竹仔魚特點是味濃肉嫩，大大加強了粥底的海鮮味。
食客有Say
潮州村（28871801）
地址：銅鑼灣天后電氣道130號地下
座位：45個
營業時間：11:00am-2:30pm，5:30pm-11:00pm