馮仁昭四圍超：
暴瘦胡杏兒賺辛苦錢買金戴

胡杏兒早排因為暴瘦而惹來同外籍男友情變嘅傳聞，但實情啱啱相反，原來杏兒同男友感情都幾穩定，早幾日杏兒走咗去半島酒店商場入面嘅Tiffany睇首飾，重好細心咁揀情侶戒㖭。

試情侶戒指

嗰日下晝兩點幾，冇化妝嘅杏兒一身隨意打扮，好瀟灑咁喺Tiffany逛一回，佢一入舖頭就行咗去睇情侶戒，重試戴咗其中兩款，但最後唔多啱心水，結果改變主意去睇頸鏈。
杏兒先後佩戴咗一金一銀嘅頸鏈，金頸鏈售價約一萬蚊，銀頸鏈售價就大概四千蚊。杏兒喺鏡前左照右照，似乎幾鍾意條金頸鏈，約二十分鐘之後就碌卡買咗條金頸鏈走人。
事後馮仁昭同杏兒傾電話，佢就唔認好事近，佢話近呢年做嘢未停過，一劇接一劇，之前辛苦咗咁耐，今次只係買件首飾仔當獎勵自己，叫大家唔使太敏感喎。