冇咩散戶吼的富力地產（2777）昨天首日掛牌，居然企得異常硬淨，最高重見過11.45元，收11.15元，比起招股價10.8元，高出3.24％㖭，真係令小初大跌眼鏡。
小初諗住呢一排，就算係外資大行做保薦人嘅新股，絕大部份均在首日以破底收場，加上呢排又唔多興炒大陸地產股，所以實在冇諗到富力可以表現得咁硬淨。
經紀黃就話，查實富力在公布新股分配時已講咗，雖然公開招股部份唔夠飛，但機構投資者方面，僅僅有6位大戶，就已經要咗國際配售部份的76.31％，其中最大的一位，更認購咗25.28％。經紀黃話，單單睇街貨乾得咁交關，只要呢6位大佬唔沽貨住，隻股實在無破底的理由，相反嚟講，若呢班大戶沽出，街外又有買盤的話，富力要升亦唔奇。
佢重話，富力昨日成交金額只有6863萬元，以一隻集資十幾廿億銀的股票嚟講，以昨日咁嘅成交，反映街貨實在唔多。
慕容小初