呢期啲「馬」真係紅，由香港協辦奧運馬術，到港台停播賽馬，都係近期大事。八方勢估唔到連財經事務及庫務局局長馬時亨亦被牽連！話說噚日馬局長出席香港工業總會第四十五屆會員周年大會午餐會，之後當然要整個演講，重有答問時間。
席間有人問近期馬仔咁紅，馬局長有冇興趣養番隻馬呢？馬局長就話，佢又唔識騎馬，又唔識睇馬，佢老哥對養馬冇乜興趣，有時間都係打番高爾夫球好啲。佢重話跑馬仔嘅學問非常艱深，真係唔識咁話喎！
其實噚日工總請咗呢位重量級嘉賓嚟，另一個原因係佢哋公布新嘜頭。八方睇過個新標誌，相比用咗差唔多半個世紀嘅舊嘜頭，靚唔靚就見仁見智，但講時代感，當然就多咗好多啦。
爆料熱線：29290000、27860099
報料傳真：26239278
報料電郵：[email protected]