我好鍾意食蛋，衰在連考試都好多科目食蛋，氣到阿媽有段時間係都唔肯煮任何有關蛋嘅食物，四季吉個個都嬲咗我，話累佢哋冇蛋食喎！不過我係大佬，佢哋邊敢出聲話我吖！後來我學識好多種唔同嘅整蛋方法，不過，其實整得最多都係奄列，簡單快捷嘛，雖然係自由廣告設計員，都好忙㗎！尤其一個人嘅時候，就會響冰箱拿出一隻蛋，打勻後加些胡椒同鹽，倒落去已經用猛火略炒過的火腿、青椒、洋葱，只要平底鑊夠油，火唔太猛，就唔會整燶。我習慣加芋頭，加些日本醬油、味醂和砂糖一齊煮，煮熟後和紅蘿蔔放埋一齊，旁邊伴以西蘭花，在西蘭花的面上加些白色的沙律醬，配埋撒上青豆、紅椒、芝麻，又好睇又好食。好彩老婆未返，如果唔係實同我爭食，等我食完至整畀佢食啦！漏咗一樣嘢冇講，就係後來我知恥近乎勇，努力讀書，雖然唔算係名列前茅，起碼中學以後我都冇再食過蛋。係咪好叻呢？（二十八）
老大大吉