呢排國慶酒會多到飛起，搞到新上任嘅政務司司長許仕仁都好唔得閒，話晒新官上任，雖然係撈番老本行，都要出席酒會social吓，所以肥龍噚日又去咗尖沙嘴洲際大酒店，做法國國慶日酒會嘅主禮嘉賓，同啲法國佬打吓交道。
肥龍噚日冇用法文𠱁吓人，但都好識做，話特區同法國都係老友鬼鬼，喺文化同經貿上真係合作無間。為咗悼念早前喺英國倫敦地鐵巴士爆炸案嘅死難者，肥龍同法國駐港總領事館嘅代表一齊喺台上默哀兩分鐘，希望佢哋早日安息。
超人：我飲可樂咋
肥龍近期舉動多多，風頭一時無兩，所以佢一出現，不時俾人捉住密密斟，出席同一場合嘅西九入圍財團之一嘅李超人，都有同肥龍近距離接觸，重不時講到哈哈大笑，當然冇人知佢兩個傾乜話題傾得咁開心。八方諗，肥龍咁精，一定唔會喺呢啲場合講公事，至於超人，法國佬年初畀咗個榮譽軍團司令獎佢，都要嚟showup吓。
法國嘅紅酒好出名，嚟得呢個法國國慶日酒會，相信都入鄉隨俗飲番杯，點知超人就好似唔係咁捧場咁喎，有記者問佢係咪鍾意飲紅酒，佢就好似小朋友咁睜大隻眼話「我飲可樂咋」，真係好玩。
其實噚日出席酒會嘅猛人，重有賭王何鴻燊、外交部駐港特派員楊文昌同警隊一哥李明逵，就連詩姐姐都着到靚一靚咁嚟祝賀，睇見個陣容咁鼎盛，足證特區同法國交情都算幾好啦。
不過，講開又講，咁多國慶酒會同社交活動，八方都為班高官辛苦，詩姐姐做足七日，聽講新丁肥龍都唔好得好多，由朝開會開到晚，冇時得閒，皆因兩位前任CS都係工作狂之人，覺得全冇問題，但係肥龍一向休閒慣，雖然預咗呢兩年冇好日子過，都諗唔到咁慘情。肥龍自己攞苦嚟辛，當然冇人可憐佢，但係長此落去，真係人都癲，會影響判斷能力，肥龍一定要撥亂反正救番自己條老命，因為重要陪老婆去聽歌劇。
爆料熱線：29290000、27860099
報料傳真：26239278
報料電郵：[email protected]