恒指又急升184點。同前日一樣，帶動恒指升得最多嘅係中移動（941）、滙控（005）、和黃（013）與長實（001），4大天王總共貢獻升幅123點，所貢獻嘅次序同前日又係一樣。
由倫敦爆炸影響告一段落後，過去4日，恒指總共彈升520點，市底好惡。恒指已破去年底高位，形勢仍然係向好，但近期直接挾上，買C輪畀貴好多，要先諗吓風險嗰便。買C輪，先等回吐。買P輪，則比較適合專業人士。
中企C輪3830：國企指數跌23點，落後恒指，博國企股追番上去，搵中企指數C輪短炒。正路之選係3830，11月尾夠鐘，輪價22.4仙，溢價3%，槓桿率11.2倍（有效8.1倍），引伸波幅21.3%。
想比較搏殺啲，則揀4855，10月尾到期，輪價26仙，溢價3.7%，槓桿率17.8倍（有效10.7倍），引伸波幅20.9%。
中電信C輪4500：中電信（728）回1格，收2.775元。中電信唔係恒指成份股，而係國企股，冇跟到中移動（941）上去，但中移動造得好好睇睇，中電信遲早都唔會失禮。
趁低買中電信C輪，冇乜得揀，正路4500，10月尾夠鐘，輪價15.3仙，溢價5.7%，槓桿率18.1倍（有效10倍），引伸波幅23.9%。
章盛