王晶稍後會開拍時裝劇《情陷夜中環》，算係時裝版嘅《金枝慾孽》，故事講保險界嘅明爭暗鬥，馮仁昭收風個劇嘅卡士有謝賢（四哥）、台灣型男郭品超、葉璇、應采兒同張文慈，會喺月底開工。
四哥今次扮演葉璇同應采兒嘅爹哋，兩女係同父異母嘅姊妹，張文慈就幫葉璇喺保險公司做嘢，佢哋為求上位不擇手段，據知葉璇同郭品超重有感情線㖭。
毋懼流鼻血
四哥好耐冇拍劇，馮仁昭問佢久休復出怕唔怕辛苦？佢噚日喺電話度就話：「都開心，因為拍劇一班演員相處好似個大家庭咁。」四哥面對葉璇、應采兒同張文慈三位靚女對手，會唔會覺得吃不消，四哥抵死咁話：「如果流鼻血就call啲記者嚟啦！」四哥瞓身拍劇，唔怕冷落女友咩，佢又笑話：「咁我咪喺片場『𠝹』女囉，不過，女友會體諒我嘅工作，我會分配到時間嘅。」
