陳奕迅（Eason）及盧巧音前晚於金鐘出席電影《老友狗狗》首映，大會安排幾隻可愛小狗與嘉賓合照，場面熱鬧。愛狗之人宣萱與麥景婷一同到場，當她一見小狗即飛奔上前抱抱。
自嘲無力賺豪宅
Eason前晚沒有與女友徐濠縈及愛女到場，有觀眾讚他真人比上鏡好看，對此Eason說：「我會檢討上鏡個樣，我唔上妝，上鏡又唔靚，不過我覺得自己好靚仔㗎。」Eason謂家中養了三隻比熊犬，與女兒相處融洽。提到容祖兒連買兩層名門豪宅，Eason笑說：「就算唱片賣得好都買唔到樓，只買到小食，或者買化妝品妝身。我咁唔上鏡，會考慮吓會唔會再上鏡畀人睇。」
而宣萱接受訪問時，提到英國最近發生的爆炸事件，她說：「我九月要去英國幫TVB宣傳劇集，都冇話驚唔驚，到八月時睇吓情況啦。」宣萱曾在英國留學，她表示爆炸發生後，第一時間致電給當地的同學，幸好全部無恙。
採訪：張俊銘 攝影：何國豪
