香港管理協會噚日頒授第十四屆優質管理獎，喺洲際酒店頒獎兼晚宴。呢個獎已有十五年歷史，旨在鼓勵優質管理嘅公司同企業。
籌組委員會主席陳祖澤話，今次參賽嘅機構嚟自多種行業，反映出優質管理愈嚟愈受中小型機構重視。第一太平戴維斯物業管理同其他四間企業得到銅獎，司法機構政務處及香港通用公證行攞銀獎，而金獎就由萬輝塗料奪得。
問到得獎感受同管理秘訣時，萬輝董事長原樹華（圖二）話，最緊要係顧客至上同團隊溝通。佢強調，得獎全賴員工努力。至於喺經濟不景時嘅策略，就係提高產品質素，擴大營業額，從而增強競爭力。佢話，公司不嬲都有培訓管理層及員工，近排重增設可容納千人嘅大禮堂，以便各級員工每月聚會，加強溝通。
蘭西聽聞，萬輝舊年只係得優異獎，今次升級，足證佢哋識吸取意見又努力不懈。
電郵地址：[email protected]