港股勁得離奇，恒指前日稍微回落10點後，昨日一彈就係160點。中移動（941）、滙控（005）、和黃（013）與長實（001），4大天王包辦咗117點，即其他29隻成份股夾埋只共升43點。如果能準確掌握重磅股移動方向與幅度，炒恒指輪，富貴萬千年矣，只不過神仙與上帝都無法估中重磅股如何郁動。
中石化C輪4561：中石油（857）收6.20元再升0.20元，受隔晚油價升上61.48美元（升1.40美元）刺激，市場錢多，堆落中石油身上。中石化（386）收3.075元，升得1格，因落後而可以睇好。
中石化C輪揀一兩隻嚟炒，主角係4561與3862。4561喺9月尾到期，輪價16仙，溢價2.8%，槓桿率19.2倍（有效11.4倍），引伸波幅23.4%。3862亦係9月尾夠鐘，輪價13.3仙，溢價5.1%，槓桿率23.1倍（有效11.2倍）。兩隻輪都係非常易買易賣，睇錯市要手起刀落都好快。
中電信C輪3443：中電信（728）收2.80元，升5仙，估計短期仍然向上。搵C輪炒，揀3443，明年3月夠鐘，輪價24.5仙，溢價9.8%，槓桿率11.4倍（有效6.5倍），引伸波幅24.1%。隻輪溢價唔低，但因長壽，唔怕縮得快。4500亦可選對象，溢價與槓桿率都靚啲，壽命則較短。
章盛