新形勢係多講財經，少講政治，阿爺嘅姿態，大家都知道啦。若有人詐儍扮懵，話睇唔到，聽唔見，咁曾局長大大巴摑香港電台，冇理由摑唔醒佢哋吖嘛？殺賽馬節目，只係略施下馬威，再摺埋十大金曲，就係打殘港台領導人嘅士氣，等佢哋以後要識得聽話，唔好駁嘴，唔好搵個記者在記者會上刁難高官，以後跪低聽旨，全部節目主持人要學習周融，以周先生為典範，吳志森之流負隅頑抗者，搵定後路都怕冇走雞咯。
識時務者為俊傑，於是財經節目越來越興旺，新城財經台一早冇咗知識產權，創下風氣任人抄。Now寬頻電視已有四十萬客戶，等待發掘ARPU（每客戶平均收益），於是出招，成立二十四小時財經頻道，搵燦哥擔大旗。據一位Sunday中人同左丁山講：「電盈收購Sunday如虎添翼，以後可以將四大產品︱︱固網、手機、寬頻、寬頻電視︱︱綑綁銷售，又可以將寬頻電視嘅財經新聞內容，供應未來嘅３Ｇ用戶，你話競爭力係唔係全港最好呢？一位同行競爭者知道我哋賣咗畀電盈之後，直情想喊出聲，因為佢以後只有捱打也。」
既然如此，燦哥又係時勢造英雄，條命生得正，一世永無憂，佢每次俾人郁，就返去吳鴻生個避風塘彎水，一有好嘢，就立即揚帆出海，大展拳腳，你話幾好呢。燦哥網絡廣闊，每逢佢有動作，一吹雞，就有幾十個燦家兵歸隊，積蘇搵到燦哥擔大旗搞Now財經頻道，唔憂冇幕後班底。
不過咁，目前市場上，原復生筆下嘅財經演員為數不多，美資大行啲分析員只肯睬彭博、CNBC，唔理會中文傳媒，將來燦哥要搞足二十四小時財經節目，搵擔得飛嘅財經演員與主持，咪話唔頭痛。咁嘞，黃毓民、吳志森快快轉型講財經，咁就唔驚俾人叮走啦。