港股回一回氣，又再急升，恒指以全日高位收市，升160點，報收14307，創出今年收市新高，且成交配合，有近220億元，今次升市，再度挑戰大型徘徊區阻力，升破後，大升浪可確認。
大行唱好，噚日大升市主要係由長實（001）同和黃（013）帶動，長實搶上78.55元收，大升3.7%；和黃高收73.80元，升2.5%，成交更逾4000萬股，總值29.5億元，比排第3位滙控（005）的13億元超出1倍有多。
大摩研究報告指長實係最抵買的大型地產股，預期未來12至18個月股價表現向好，維持「增持」評級，目標價100元。大摩早前已推介和黃，指其盈利能力強勁及價值吸引，將其投資評級調高至「增持」，目標價亦提高至90元。
美國物業交易未入帳
遠東發展（035）佔少數權益的美國物業交易，節外生枝，其實事件嘅發展有兩個睇法，壞嘅方面，係交易可能會拖延，收益未能入帳，好的方面，係物業有機會再賣到一個高價，收益更豐。事實上，呢單被稱為世紀的交易，以17.6億美元成交，賣家成本只係1億美元，賺到笑。
噚日早市，遠展應聲滑落，有基金大舉洗倉，股價最低質到落3.075元，但亦有大行趨低硬接，在3.125元呢個價，起碼有2至3千萬股轉咗手，噚日遠展成交6400多萬股，總值逾2億元，收3.175元，只跌0.10元，都算「戰況」激烈。
遠展噚日派成績表，業績同市場預期相若。05年度（3月年結）盈利4億元，升1.7倍，每股基本盈利32仙，派末期息5仙。有一點要注意的，係遠展有兩個項目的收益未有入帳（並非美國物業交易），如計入呢兩條數，盈利可達5億元。
現年度，上海物業銷售情況理想，加上本港酒店陸續加入營運，以及投資物業的租金收入，估計盈利可上升至6億元，每股盈利47仙，以高增長股仍屬保守的10倍PE計，股價已可見4.70元。至於美國單「刁」的豐厚盈利，成3億幾元，暫時唔定入帳時限，等情況明朗後先算。遠展計劃投入28億元發展的澳門項目，08年開始提供貢獻，單係澳門每年盈利便達5億元，股價表現可更進一步。
郭兆誠