出身自飲食世家的吳鎮宇最近投資六位數字，於黃埔開設拉麵甜品屋，並由家人打理業務，炮製自家甜品。榮升老闆的鎮宇日前更充任冰火廚師，在店內操刀，即席炮製熱騰騰拉麵及消暑芒果涼粉冰。
吳鎮宇近期斥資六位數字，於黃埔蔡瀾美食坊內開設「皆大歡喜麵丼甘味屋」，並由家人負責打理生意，由於鎮宇日內要到成都準備新片《血戰到底》的前期工作，故他日前趁空檔到食肆做生招牌，親自炮製日式拉麵及芒果涼粉冰。
自小隨父入廚房
鎮宇揚言開拉麵甜品店屬他首次公開的業務，該店至今營業已一個多星期，他笑說：「其實喺好耐之前，我想將澳門嘅食物帶過嚟，好似燶咗嘅蛋撻（葡撻），又想攞大陸一間羊肉連鎖店嘅代理，但每次諗嘅嘢都有人做咗，所以𠵱家做番啲基本嘢。揀呢個地方開舖，係覺得啲人上得嚟就真係食嘢，而呢度亦都冇甜品屋。」
鎮宇父親生前是酒樓頂級點心廚師，母親是個海鮮專家，就連他太太的家人也從事咖啡生意。鎮宇從小就耳濡目染，會隨父入廚工作，故他不只識食，而且識煮，他說：「我同屋企人都鍾意食麵，我去過咁多地方做嘢，都食勻晒全中國嘅湯麵，對麵太熟啦，而做甜品嘅前景好好，所以試吓搞。我哋會提升口味，用嘅係有機豬肉，會買啲水做貴啲嘅冰，做甜品嘅水質係好緊要。」
「寫食經應該識煮」
鎮宇還譏諷一些只懂在紙上談兵的食家，他說：「全香港有好多寫食經嘅人，但唔識做（菜），寫食嘅人應該了解煮，要煮出嚟至心悅誠服。」
採訪：朱倬誼
攝影：羅德光
