噚日有個調查話香港人做嘢好搏命，一個禮拜做足七日，大家唔好以為好出奇，特區政府高層就有一個人辦：唔係老董，而係梁愛詩司長。
八方有次問周梁淑怡，詩姐係咪要走，點知佢叫八方去問律政司嘅同事，問司長有幾勤力。言下之意，係話冇乜人頂得到佢份差事。打聽完，先知詩姐原來每日朝八晚十點半，星期六、日如常，只係禮拜日有時陪媽媽飲茶，下晝返寫字樓。
梁愛詩肯定唔係博升，只係佢好人，成日出席各樣活動，搞到要開OT先至清理得晒啲文件。當然，佢阿姐係工作狂就不在話下啦，換咗係馮華健，必定冇咁抵得諗，所以老董唔放人，煲呔亦想佢留低。不過，聽講詩姐今次去意已決，主要係佢已屆六十六，身體尚好，如果唔去玩吓，實在對唔住自己，反正啲大鑊嘢都搞掂晒，阿爺都應該放人啦。
傳真︰2623-9278
電郵︰[email protected]