陳松伶噚日接受商台節目電話訪問，佢話四月時喺街度撞番二十幾年冇見嘅妹妹，松松話：「有日喺中環拍外景，突然間有人走嚟問我認唔認得佢，後尾我開心到大叫佢個名，重攬住阿妹。」其實當年松松同家人誤會重重，佢話：「當年我唔明父母點解要我出嚟做嘢，又唔會同我講經濟拮据。」後尾搬出嚟一個人住嘅松松，𠵱家就同妹妹住，重打算買番間屋同父母一齊生活。