老虎仔隻遠東發展（035）昨日公布靚仔業績，但就傳出出售美國物業單交易出現波折，重要打官司，搞到遠展最低被質落6%至3.075元，好彩收市跌幅收窄至3.05%，收3.175元，最勁係成交金額高達2.02億元，好耐都未曾見過有咁大成交。
遠展昨日公布截至今年3月底全年業績，盈利有4億元，比舊年同期勁升169％，另有末期息5仙派，睇落都算唔錯，況且遠展在澳門同上海大把搞作，本地酒店生意又係收成期，照計今明兩年業績都唔使愁，若果唔係單官司影響，相信股價應有刺激。
經紀黃話，近月來澳門概念唔多sell得，上海物業市場亦受阿公措施打擊，遠展股價冷淡好易理解，加埋噚日單官司自然帶來短暫影響，但佢就話，遠展響美國的地產投資係以成本價入帳，以天價賣出固然係錦上添花，但未賣成都唔應該對帳目有影響。
此外，噚日大市急升，喺由大地產股長實（001）帶動，唔排除二三線地產股跟住可受惠，所以遠展中線亦唔應該睇得太淡，但以短線而言，股價波動就難免。
慕容小初