港股昨日早段牛牛皮皮，點知午後成隻老虎仔。在長和孖寶領漲下，恒指突破小時圖頭肩底頸線（約14220水平），升勢隨即加速，結果恒指全日大升160點，收報14307，成交增至219億元。
按頭肩底量度升幅，恒指上望14500水平。趙飛雲今次過於保守，倉內冇貨，高追C輪比較蝕章，倒不如博佢有後抽，回試頸線附近買恒指C輪，對象有3492同4909。
賭大市要等調整，但個別股票則可伺機買入。迪士尼樂園9月開幕，在此之前，相關概念股不會寂寞，昨日就見零售股蠢動，表現較好的慕詩（130）、莎莎（178）和廸生（113），升幅有3至5%。
原地踏步嘅零售股有佐丹奴（709），值得留意。過去個幾月，佐丹奴一直有基金盤密密買住，樓下嗰個主要股東股權變動表，經常見到安本（Aberdeen）基金增持，而且數量唔少。
基金咁有耐性收集，唔會無的放矢，跟佢哋買，應該唔錯得去邊。
睇走勢，佐丹奴亦成個蓄勢待發格局。股價昨收5.45元，10日平均線即將升破50日線，發出黃金交叉訊號；MACD已見轉好，而且有勢發出雙牛買入訊號；隨機指數%K亦剛剛升破%D，利好。股價短線可望先上試保歷加通道頂5.7元水平，若市況相就，中線不難重遊4月高位6.1元。
趙飛雲