身為曼聯超級球迷的李克勤，前晚喜獲曼聯官方網站委任為「曼聯大中華區中文官方網站大使」，月底還有機會隨球員到北京宣傳，克勤表示這次純粹是義務性質，但仍然感到驚喜不已。
李克勤前晚往中環出席曼聯網站啟用儀式，大會並委任他為「曼聯大中華區中文官方網站大使」，明星足球隊成員吳家樂、洪天明和張兆輝等均有往撐場。
受寵若驚
曼聯球員本月底來港作賽，前晚中文官方網站率先宣布啟用，克勤特別穿上紅色曼聯球衣到場，由於曼聯這次來港作賽由亞視取得轉播權，所以與無綫有歌手合約的克勤無緣為曼聯唱會歌，他說：「點知𠵱家柳暗花明又一村，我可以做到佢哋網站嘅大使，呢次都係佢哋主動聯絡我嘅，所以都有啲受寵若驚，佢哋都有問我點解唔唱首歌，我話係因為電視台嘅問題。」
對於今次獲邀擔任網站大使，克勤說：「我咁多年都係曼聯嘅diehardfans（死忠球迷），可能咁樣佢哋咪搵我囉，而且做大中華大使，除咗香港，喺內地都要有一定知名度。」
爭取簽名
曼聯球員本月二十五日會到北京宣傳，克勤亦獲邀同行，他希望屆時可以與C朗拿度等球員合照和簽名留念。
問到克勤今次為曼聯效力的薪酬是否可觀？他說：「冇講。」莫非是義務性質？克勤說：「係呀，因為官方網站會有一個平台介紹我嘅個人資料，聽講宣傳費大約有七位數字，佢哋重話想將我首歌放喺網上，但暫時趕唔切。」
採訪：駱華齡 攝影：何國豪
