夏日炎炎身水身汗，一時口痕想食嘢，第一時間諗到乜？斷估唔會係鳳爪排骨飯，應該亦唔係乾爭爭的餅乾啩？想一次過滿足心靈同生理需要，睇怕都非冰涼的甜品小點莫屬，咬一啖就可以由內凍到外，身心暢快！
記者：張銘恩
攝影：陳盛臣、楊錦文
模特兒：JoeyMo
迷你水果冰點夠鮮味
呢款新出的甜品其實就好似菠蘿炒飯咁，用番該水果來盛戴雪糕或者雪葩，而椰子、菠蘿同南瓜等就用咗迷你版，非常Cutie！雪糕/雪葩當中混有粒粒鮮果肉，比一般盒裝雪糕更有鮮味，而最特別的就一定要介紹腍柿款，因為可以連埋果皮一次過大啖食，感覺超爽！
新口味雪糕雪條
雖然好懷念同朋友分享孖條的日子，但世界不斷地轉，新款雪糕雪條亦已經出咗好多好多轉！今時今日玩味道玩Gimmick玩材料乜味都有，就算一日試一款，可以試足一個夏季！
爆笑「荔枝舌頭」
WALL'S今季主打雪條，叫做「荔枝舌頭」，點解？因為荔枝味的雪條中加入了不少蒟蒻，質感有點似啫喱狀，非常有「彈性」同軟身，可以好似舌頭咁擺動！咬落就爽爽哋，總之好玩又好食！倪震食過都橕，原因重好…得！
健康西瓜條
美國Fruitfull純天然西瓜條，以鮮果肉加果汁製造，最大賣點係零脂肪同零膽固醇，口痕友健康BestBuy！
潮興抹茶口味
將近年大熱飲料變成冰條，包括有蜂蜜綠茶味、柑桔檸檬味同柚子綠茶味各兩支，少甜又解熱。
養顏楊枝甘露
土炮阿波羅將香港人最愛的糖水楊枝甘露變成雪條，當中有50%真正芒果肉製造，用料十足！
清香豆腐味
通常只於街舖食到的豆腐雪糕，終於可以帶返屋企慢慢歎！維記出品的特濃豆腐味，最啱愛清淡的人。
紅豆×綠茶雪米糍
外層香軟綠茶皮，包着以真正紅豆茸製成的紅豆雪糕，香滑滋味。
粒粒榛子
雀巢Mega最新口味呍呢拿榛子家庭裝雪糕，粒粒榛子出奇地脆，並有煙韌棉花糖，口感特別。
布甸糖水有益養顏
𠵱家人人講補身講瘦身，甜品都要跟着潮！以下有標榜低脂低糖，甚至美顏等甜食。懶理是否只係噱頭，總之食得開心人都靚啲！
杏仁/芝士布甸
㗎仔果然有諗頭，居然諗到用芝士做即食布甸，難得味道唔太膩，易入口，另有杏仁味，白白滑滑！
靈芝蘆薈膏
不但以靈芝精華製造，還加入了來自美國的蘆薈肉，並以有益蜂蜜帶出輕微甜味，夠晒健康的低糖產品，香港製造。
潤喉枇杷
枇杷啫喱內有足料兩大粒批杷，可潤喉化痰，並有清熱淨腸等功效，夏日消暑美容最好。
咖啡啫喱杯
罕有咖啡味啫喱，香滑醒神，備有糖漿可以另上，多甜少甜唔甜任你調校。
低脂果凍
早排乳酪做埋雪條，今季終於輪到果凍！牛奶公司的Delight芒果系列，乳酪成份以低脂奶製造，KeepFit之選。
晶瑩啫喱
通透得有理，因為啫喱內藏原粒提子、車厘子、邊桃等等水果，食落啖啖肉！
飽肚蛋糕小點
當一支雪條、一杯布甸都未能滿足自己，原來心底裏的終極渴求，好可能就係一件予人實實在在之感的蛋糕！
一口CreamPuff
SlagroomSoesjes出品的CreamPuff，一口一啖，脆軟外層牛油酥配上滑溜忌廉，送茶同咖啡都冇得頂，每盒約20粒。
四層夾心蛋糕
LeFramboisier雪糕蛋糕，底餅上一層士多啤梨雪糕再加一層呍呢拿雪糕，面層淋上濃縮紅莓汁，酸酸甜甜好惹味，每盒四小件。
朱古力芝士蛋糕
Crofter's朱古力芝士蛋糕，連底餅都係用朱古力餅製，面層就加上車厘子汁，味道濃烈，朱古力迷一定要試。
便攜件裝芝士蛋糕
由擁有三十多年做Cheesecake經驗的國際名廚EliSchulman研製，質感Creamy味道濃郁，蛋糕中更加有朱古力粒。
香港人的富豪雪糕車
香港人認識《藍色多瑙河》，大都不是因為作者約翰史特勞斯。聽到其輕快調子，只會聯想到滑滑軟雪糕，讓大家有這個集體回憶的正是香港雪糕鼻祖，富豪雪糕車。
富豪雪糕百分百本地原創，在港已有30多年歷史，廠房設在火炭，每日製造新鮮雪糕，當中以呍呢拿軟雪糕最馳名，由最初的五毫子升到現在的六蚊杯！可惜由於牌照問題，現只剩十多輛雪糕車行走港九各地，想回味兒時感覺，不妨於11am-10pm到尖沙嘴文化中心、中環天星碼頭、金紫荊廣場、旺角步行街（晚上）碰碰運氣，看自己與《藍色多瑙河》有沒有緣份！
食雪糕最好一次過
一般雪糕店內的冰櫃都維持於-8至-10℃，家庭裝雪糕則應儲存於0至-5℃的冰格內。吃唔晒，應把冰格調校至-10℃再雪。不過雪糕應避免溶掉再雪硬，因為雪糕在10℃以上便會滋生細菌，況且重新雪硬會令雪糕變質，變成沙冰狀，失去原有口感。
售賣點：
（a）City'super：銅鑼灣時代廣場B1地庫25062888
（b）西田百貨：沙田新城市廣場3期3樓26941111
（c）吉之島：鰂魚涌康山道2號康怡廣場南28846888
（d）永安百貨：佐敦彌敦道345號永安九龍中心27106288
（e）GREAT：金鐘太古廣場LG1地庫9號舖29189986
（f）OLIVER'S：中環遮打道10號太子大廈2樓201-205舖28107710
（g）各大惠康超級市場：22993838
＊超市貨品價錢浮動，本版資料截至7月13日。