所謂「屋漏兼逢連夜雨」，港台俾煲呔抽水向北京邀功後，重要成日喺烽煙節目俾馬迷抦，話佢哋唔照顧馬迷感受。
八方聽聞，港台有口難言，因為賽馬節目嘅收聽率，同入場馬迷人數一樣，不斷下降。
搞到港台咁慘，馬會主席夏佳理都有啲責任，以佢同肥龍、煲呔嘅關係，應該可以救到港台播馬有餘，因為早喺五月已經放晒聲氣啦，但夏主席偏偏太遲出聲，終於搞到冇得玩，真係時也，命也。港台𠵱家重要諗計擺平班忠實擁躉。
之後又輪到李國章落井下石，話港台教改節目唔專業。八方聽聞話，港台都好畀面李國章，做嗰輯節目前都有搵阿瑟王，但佢提出一個要求，就係如果唔畀佢喺節目度講多啲，就唔肯接受訪問，聽講佢重叫其他官都唔好接受訪問喎。
假如這是真的，李國章實在太惡，莫講話港台，其他傳媒遇到咁情況，點都唔會睬佢啦！
傳真︰2623-9278
電郵︰[email protected]