曾喺《魔戒》系列裏面扮演巫師甘道夫嘅英國老牌演員伊恩麥基倫(IanMcKellen)，一向都公開承認自己嘅同志身份，佢日前喺Live8演唱會見過碧咸（DavidBeckham）之後，即刻對呢位萬人迷嗒晒糖，好想再搵機會同佢見面。
盛讚狼人曉治
現年六十六歲嘅伊恩麥基倫，老早已經公開承認自己係男同志，早排佢重喺挪威嘅同志大遊行出現，令在場同志非常興奮。已經有個年輕希臘壯男愛侶嘅伊恩，日前喺Live8見到碧咸，為之深深着迷。有行內人士就勸碧咸要小心啲，因為伊恩心思思想再搵機會親近碧咸。
其實伊恩一向好易對啲靚仔起痰，佢喺《變種特攻2》入面飾演磁力王嗰陣，就公開講過話好「欣賞」扮演狼人一角嘅曉治積曼（HughJackman），佢重話：「你想唔想像到成日對住曉治咁正嘅男人會係點？我都成日企喺又索又性感嘅荷爾芭莉（HalleBerry）隔籬，但一啲反應都冇。」
演同性戀導演
多年前，伊恩亦喺電影《魂斷夢工場》入面扮演一個有同性戀傾向嘅年老電影導演，重對男主角班頓費沙（BrendanFraser）虎視眈眈，甚至強行向對方做出越軌行為。不過，現實生活中嘅伊恩係同志嘅模範，加上佢係專業演員，都算有頭有面，相信點都唔會對碧咸亂嚟嘅。