一層中環中心值幾多錢？係一億五千九百萬，月租就大約要五十三萬。
話說創業板上市的天時軟件（8028）上日宣布，以上述價錢售出自用之總部寫字樓，然後以上述月租向新業主租回。呢層樓，係中環中心高層七十九樓，面積一三二一三平方呎。以此推算，呎價係一二○三四，呎租係四十蚊。
萬二蚊呎中環甲級寫字樓，四十蚊呎租，是貴是平蘭西唔敢講。不過，天時一九九九年十二月三十號向長實買入該物業時，作價係每呎一三五○○大元，總金額一億七千八百餘萬。五年下來，重輸成二千萬，邊個話買樓投資會發達？
天時當科網熱潮時上市集資，之後用咗筆錢去買樓，與創業板原意有違，引起好大迴響。今日睇返轉頭，揸物業雖然輸少少，但總勝過科網泡沫。天時老闆由虛入實，真係好有眼光。