一隻泰興（389），令到基金界大地震，呢輪就頻頻見佢哋重整投資組合，唔少基金股都被洗倉，噚日輪到彩星集團（635），最低質到落1.13元，收1.22元，大跌0.24元，跌幅16.4%，成交就大增到5278萬股；經此一跌，彩星往績PE7.3倍，息率成5厘。
基金界最現實，買錯一隻股票，負責人就要起身；新人登場，唔啱心水嘅成份股，就會洗倉，所以，呢輪好多基金股都走晒樣，但若果只係人事問題，而公司並冇事，則呢類洗倉事件，又正係低吸的大好機會。當然，基金股有頗多係PE極高的，呢類股票並不宜散戶沾手；買那些PE和息率吸引的，進可攻，退可守。
早輪洗完倉嘅銀建國際（171），近日股價表現已轉穩，雖然有基金繼續減磅，但亦有基金上車，而且「買意頗濃」，相信銀建在低位整固完成，貨源再度歸邊後，有機會重拾升軌。
業務大有作為
銀建急跌之日（上月29日），公司在市場大手回購2700萬股，股價由2.80元至2.025元，動用資金近6600萬元。銀建的回購行動，在頗大程度上暗示公司冇事，內地指剝離不良資產處置違規，冇燒到銀建嗰叠。
講到處置不良資產，內地嘅不良資產以千億元計，而且中央係好希望在兩三年內全部搞掂，所以，呢門生意係大有作為。銀建係信達嘅旗艦，自轉型資產管理公司後，只在信達手上攞到兩個資產包嚟做，今後會唔會再收購其他不良資產，答案幾乎係肯定嘅。一旦落實有新deal，市場疑慮就會消除，銀建股價亦可望回升。
銀建發行17億股，管理層表示公司可回購10%股份，亦即1.7億股，最近的回購只佔發行股份1.54%，因此，唔排除銀建在適當時候會再進行回購。
銀建04年度（12月年結）獲利4.05億元，大升122%，05年連同物業租金同基建項目收入，保守估計盈利可達6.5億元，每股盈利37仙，以PE12倍計，股價已可翻一番。
大市噚日升後調整，恒指微跌10點，短期仍係窄幅上落之局，有信心8月會開始升市，一路到年底。
郭兆誠