嗶波猴呢隻PlayStation嘅吉祥物無人不識，自出道到𠵱家，出咗好幾個動作遊戲同埋MiniGame，俘虜咗唔少男男女女嘅心，新作《捉猴3》喺聽日（7月14號）就見街喇，雖然遊戲嘅繁體中文版本要喺9月先推出，但係心急嘅嗶波猴Fans，相信都忍唔住手買呢個日文版本率先玩番夠本喇！
記者：梁瑋瑜
甩繩馬騮 鬧電視台
今次嘅《捉猴3》還原基本步，行番動作Game路線，不過玩家絕對唔需要擔心冇新意，因為今次遊戲無論喺故事情節同埋玩法上面都加入咗好多新元素，務求令到大家可以玩得盡情！
故事講述呢班嗶波猴又再次由研究所逃走，今次重大鬧電視台，平日只係着住條白色褲嘅嗶波猴，突然間多咗好多唔同形象，一時化身成西部牛仔，一時又扮成記者報新聞，重自己充當埋導演，迫住全世界嘅人去睇佢哋自導自演嘅「馬騮戲」，雖然身為玩家睇到佢哋咁可愛嘅造型，只係會覺得好爆笑，不過亦唔可以唔履行你嘅捉猴任務，幫助全世界嘅觀眾脫離「馬騮掌」。
捉猴道具夠創新
《捉猴3》其中一個新加入嘅元素係玩家可以選擇小悟或者佢嘅孖生家姐彩美成為遊戲主角，當睇到嗶波猴出現喺電視上面嘅時候，就要盡快去電視度去捉晒佢地，唔好以為淨係班馬騮先識得變身，今次兩個主角都可以變身成唔同嘅身份，例如變成阿拉伯人召喚阿拉丁燈神出嚟幫手，或者化身成身手敏捷嘅忍者等等，增加主角嘅實力，另外除咗激光棒同埋一向用開嘅捉猴網外，呢集又加入咗機械人、坦克車等等嘅交通工具，畀你快啲完成任務，記者試玩過後，覺得雖然加入咗新元素，會令到遊戲難度增加，不過就真係非常之好玩，而且畫面亦都豐富咗好多。
懶正經扮《MGS》
呢班嗶波猴嘅行為雖然係好擾人，不過憑住佢哋咁可愛嘅造型，各位Fans又點忍心捉晒佢哋就算，所以遊戲又加設咗一個部份，畀玩家將攝影機裏面嗶波猴拍低嘅爆笑片段進行剪輯、加入字幕等等，製作成一段獨一無二嘅短片。
另一個驚喜部份，係遊戲裏面加入咗一個擺明扮《MGS》、叫做《MesalGearSolid》嘅MiniGame，今次嗶波猴會做番正派，幫忙搵番畀恐怖分子攞咗嘅MetalGear，見到嗶波猴重裝上陣已經好好笑，加埋佢哋懶正經嘅樣，身為Fans一定唔可以錯過！
SonyStyle（23452966）
