民建聯噚日喺大會堂美心舉行十三周年黨慶晚會，出席嘉賓陣容鼎盛，除咗有久未露面嘅全國政協副主席董建華，中聯辦主任高祀仁、外交部駐港特派專員楊文昌、新的特首煲呔同三位司長，七位問責局長包括李國章、李少光、何志平、孫明揚、林瑞麟、葉澍堃同王永平都有現身，驟眼睇落真係以為係特區政府搞嘅酒會。
以前從未出席過民建聯酒會嘅煲呔，噚日都歷史性地畀面捧場，煲呔一到，就四出同民建聯嘅人傾偈，笑到眼都唔見，呢啲場面以前都好罕見㗎。八方重見到，煲呔上台致辭之前，不停咁咳，動作之大連企喺佢左近嘅董生都忍唔住要擰轉頭昅昅。
馬丁笑言要轉會
喺咳嗽未清、身體不適之際，仍然肯抽身去民建聯酒會喎，換轉係以前，煲呔未必肯咁做，但今時不同往日，唔做多啲工夫，又點可以叫民建聯繼續支持政府呢？
八方噚日問煲呔，係咪專登去識啲新朋友，佢笑住咁答：「呢度個個都係好朋友」，真係有啲肉麻，不過唔知人哋當唔當佢係老友。問民建聯主席馬力，覺唔覺得煲呔今次好畀面時，佢只係話同特區政府關係一直都好好喎。
八方聽聞馬力遲啲喺小西灣嘅辦事處開幕禮，煲呔都應承咗去，咁樣睇嚟，煲呔日後會好重視民建聯，政治上冇永遠敵人，真係冇講錯。
除咗大班高官，其他政黨頭頭都有到賀，不過民主黨李永達同自由黨田北俊都做咗快閃黨，到咗一陣social吓就走人。馬丁就留耐啲，唔知係咪因為馬力專登為佢做咗個名牌（掛喺心口嗰隻）。馬丁重話要轉會，但未交會費，搞到身邊嘅民建聯前主席曾鈺成都喺度大笑。
高祀仁唔認調走
經常語出驚人嘅賭王何鴻燊，到尾段突然出現，八方問佢點解大駕光臨，賭王就堅持請到就會去喎，重話如果民主黨請佢，佢都照去。
有傳中聯辦主任高祀仁遲啲會被調走，高主任噚日澄清絕無此事，否認中聯辦有任何人事變動，重好風趣咁話，會同彭清華副主任拍住喺中聯辦工作，直到永遠喎，咁就真係要問過胡溫啦。
爆料熱線：29290000、27860099
報料傳真：26239278
報料電郵：[email protected]
