港台唔播賽馬，已成定局，特首、司長、局長都出過聲，小小廣播處長點有力去頂呀？拖得兩拖重俾曾局長刮一巴㖭，話早在五月已有決定喎。呢位曾局長睇落都係唔係冷靜之人，唔襟激，開記者招待會時俾港台記者質問，竟然開始扯火；上次講講吓西九，佢又無端端挖一啲已經冇乜人記得嘅數碼港文件上網，為各方面添煩添亂；呢，今勻又來炮仗頸，自爆話五月時已決定停止港台播馬，件事想話唔政治化都唔得。
無論港府要點樣整治港台，控制聲音，或美其名曰不與民營電台爭利，港台停播賽馬，左丁山都要反對。左丁山算係馬圈中人，賽馬已經養活大量評馬人、賽馬工作者（馬會職員另計）、報紙、印刷工人，大大話話，有幾萬人靠賽馬事業維生，馬會每年捐款十億元做慈善，賽馬博彩稅去年便已繳納八十幾億（以前重多），無論從邊一個角度睇，賽馬對香港社會嘅重要性，都係一隻大笨象，相比之下，明光社（反對派）只係一隻白紋伊蚊。港台停播賽馬，直接打擊廣大馬迷對賽馬投注嘅興趣，所有與賽馬有關嘅人士，都應該反對，馬會主席夏佳理同前馬會董事許仕仁老友鬼鬼，冇理由唔代表馬會向政府游說，要求港台恢復播馬嘅啫。佢唔去講，或者講唔掂，大概已經暗示咗，港府決心向港台開刀，旁人不得進言。
港台為小眾，還是為大眾？納稅人嘅聲音，由邊個去代表？唔講賽馬，講吓藝術文化，邊啲係小眾，邊啲係大眾？點講得清楚呀？高志森為搞話劇，努力二十年，好彩未輸死，你話佢與杜國威創作嘅話劇係大眾還是小眾呢？梁家傑議員講藝術、舞台劇，你聽過未？你話梁家傑講西九，代表大眾還是小眾呢？呢個世界真係好荒謬嘅。