港股前日急升後，昨日好反覆，恒指埋單微跌10點。單係隻中移動（941）唔見0.15元，已經拖低恒指9點。是日威水藍籌，仍係長和孖寶，長實（001）升0.70元，和黃（013）升0.60元，兩隻股票拉高恒指13點。
長和逼近去年12月高位，要破位都要大市氣氛夠靚或有非常利好消息支持，長和系C輪已不宜高追。日中偶然見回落啲，則可在低位博反彈，做即日鮮，唔適宜過夜。
中移動C輪4934：中移動高低相差0.80元，波幅2.9%，熱門C輪之一嘅4934，高低相差4仙，波幅23%，係正股波幅放大高達8倍。
中移動短期走勢不脫反覆格局，吼住跌幾毫之時低買C輪4934，正股升幾毫之時離場，炒上落。4934喺11月中夠鐘，輪價18.3仙，溢價3.6%，槓桿率15.4倍（有效9.7倍），引伸波幅20.5%。
國壽C輪4853：國壽（2628）喺5.20/5.25元拉鋸好耐，跌落去有人買番高。吼每次回落，低買C輪4853，做短線，咪貪心，有得賺先賺咗再講。隻輪11月中夠鐘，輪價35.5仙，溢價5.8%，槓桿率14.8倍（有效8.7倍），引伸波幅24.4%。4843條件較4853稍佳，昨日升幅大過4853少少。
章盛